（台語版）日本經典童話：下雪天的晚上，雲兒帶著什麼秘密去敲門？【🌙 月亮睡著了】 #睡前故事 #日本傳說 #乾淨校園 #報恩 #仙鶴

故事聽了矣 就愛睏矣喔 彼是一个足寒的冬天 外口的風透甲咻咻叫 滿天散雪咧跳舞 厝內底的阿公佮阿媽拄當咧食暗頓 雄雄 聽著敲門聲 阿公碗箸隨囥咧 舊裘仔幔咧 遮晏矣 毋知是啥人咧 門一拍開 看著一个規身軀雪的查某囡仔徛佇門口 伊面仔白蔥蔥 喙唇閣小可咧掣 講 好心的阿公 我叫雲兒 我行毋知路矣 敢會使予我佇遮蹛一暗 阿媽聽著 緊共伊搝入來厝內 緊入來 外口寒hiú-hiù 毋通予寒著喔 阿媽捀一碗燒滾滾的薑茶來 雲兒溫溫仔共啉落 身軀就沓沓仔燒絡矣 對彼工開始 雲兒就蹛佇阿公佮阿媽的柴厝仔內 伊會掃塗跤 嘛會煮食 閣定定唱歌 有一暗 雲兒共阿公佮阿媽講 我從細漢就無親人矣 蹛遮 我感覺足幸福的 阿公 阿媽 我敢會使做恁兜的囡仔 阿公佮阿媽的目屎隨就輾落來矣 憨囡仔 當然嘛會使 自按呢 快樂的歌聲就佇厝內玲瓏踅 規間柴厝仔攏是笑聲 有一工 雲兒講 阿公敢會當共我買寡絲線 我想欲織布 阿媽目睭展大 雲兒會織布喔 雲兒笑咧講 嘿 會啊 毋過我咧織布的時 恁千萬毋通偷看喔 好無 袂使看喔 阿公佮阿媽雖罔嘛毋知影是按怎 嘛是共應好 雲兒共家己關佇房間內 規工攏聽著雲兒織布的聲音 過三暝三日 雲兒的房門總算拍開矣 雲兒用雙手捧一匹布 阿媽喝一聲 唷 因為彼匹布金鑠鑠像虹五彩十色遐媠 阿公共雲兒織的布提去街仔賣 無人看過遮奇巧 遮媠的布 庄頭的人隨掃了了矣 阿公手捾著拄才買的米佮棉襀轉來 笑甲若囡仔咧 雲兒織布愈織愈緊 花草嘛那來那媠 柴厝仔內 加買新爐仔佮新棉襀 米甕仔嘛毋捌閣空矣 毋過逐改布若織好 雲兒的面色就白甲若雪 伊兩肢手攏會冷吱吱 阿媽就目頭結結講 老的仔你敢有感覺 雲兒敢若那來那瘦呢 阿公勻勻仔吐氣 唉 是啊 伊都攏講無代誌啊 彼暗 阿公阿媽心內淡薄仔掛意 欲恬恬仔去共探看咧 𪜶輕聲細步行到雲兒的房門口 對門縫共偷看入去 唷 隨緊共氣激咧 險險仔喝出來 內面無看著雲兒啊 干焦一隻白鑠鑠的鶴 白鶴徛佇布機仔前 用喙共家己的鳥仔毛掣落來 閣共鳥毛佮絲線織做伙 雄雄 白鶴煞停落來 寬寬仔越頭 身軀散射出微微仔光 白鶴慢慢仔 變做雲兒矣 天啊 阿公的手咇咇掣矣 阿媽嘛掣一趒 雲兒看著阿公佮阿媽 目屎含咧講 我毋是凡間的人啦 我是予阿公救落來的仙鶴 彼工真正是寒天閣凍地啊 阿公揹著重huàinn-huàinn 的柴佇山路咧行 雄雄 伊聽著 嘎 嘎 的吼聲 阿公共樹仔枝的雪撥開 煞看著一隻白鶴予陷窟仔纏牢咧 頷頸束甲絚擋擋 白鶴活生命佇咧擗翼擗毋過索愈絞愈絚 阿公袂顧得伊兩肢手凍甲紅記記 誠細膩仔共索仔敨開 白鶴共頭擔起來 目屎含目墘 掠阿公金金相一下 翼擗擗咧隨飛起天頂矣 雲兒共上尾的一匹布捧咧 為著欲報答恩情 我才變做人來遮 阿公 阿媽 這是我最後的心意 請恁收落來 這馬我愛轉去我該去的所在矣 阿媽目箍紅紅講 莫啦 雲兒你莫走啦 你是阮兜的囡仔呢 雲兒頭幌咧 目屎閣閃閃爍 我原底是天頂的仙鶴 這馬我愛轉去矣 雲兒伸出兩支手 規身散射出微微仔光 這陣光那來那金 尾仔雲兒的手骨化做白鑠鑠的翼股 佇阿公阿媽拄喝一聲的時 雲兒講 莫艱苦啦 我定著會閣轉來看恁嘿 講煞 雲兒化作一條光線 飛起天頂矣 彼下暗 月娘對雲的後壁趖出來 一條銀白色的影跡佇天頂咧踅 一支鳥仔毛 輕輕仔落佇阿公的手底 燒燒呢 佮雲兒的手仝款燒絡 飛去仙山靈境恬靜自在的仙鶴 感恩睏去矣 柴厝仔內的阿公阿媽 嘛恬恬仔睏去矣 月娘嘛睏去矣