（台語版）被月下老人的紅線綁了，會發生甚麼事?【🌙 月亮睡著了】 #睡前故事 #緣分 #乾淨校園 #月下老人的紅線

聽講 兩个人會結婚佮一條紅線有關係 你敢想欲知影是按怎 古早 有一个叫韋固的少年的 有一改他到外地 蹛入旅館了後就到市仔踅踅咧 行佇路的時 伊看著月光下一个老人坐佇遐 老人揹一个膨膨的麻布袋仔 手裡閣提一本足厚兼反黃的古冊 伊拄看甲規个人神神 韋固好玄咧想 這爾暗矣 老歲仔人咧看啥物冊 遮爾痴迷 伊忍袂牢過去 好禮仔共問 老大人 你咧看啥物冊咧 慈祥的老人攑頭文文仔笑講 少年人 我咧看一本奇妙的冊 這本冊矣 號做姻緣簿 姻緣簿 韋固目睭展大蕊 彼是啥物款的冊矣 這本冊矣記錄了所有天跤下查埔查某的緣分 佮啥人會成做一家口仔 攏寫甲現現現 老人指著身邊的麻布袋仔 講 你看 這內底貯的紅線 只要我用紅線共兩个人的跤 輕輕仔共縖做伙 毋管相隔偌遠 終其尾𪜶攏會做翁某 韋固一直想欲娶某 毋過攏無成功 伊聽煞了後 那緊張那期待共問 老大人 按呢你會當共我講無 我的紅線會縖予啥咧 老人 頭頕頕咧 徛起來 對燈火通光的市仔行過去 韋固就窸倏綴伊過去 伊緊張甲心肝頭 規个噗噗跳 下昏的夜市鬧熱𩑾插 人沖沖滾 有賣李仔攕的 歕糖尪仔的 閣有賣妝娗物仔 啥物攏有 行矣行矣 老人雄雄煞停落來 韋固順老人看的所在影去 干焦看著一个老阿婆 伊拄佇抾人賣賰的青菜 這个老阿婆 衫破閣舊 猶有一蕊目睭 無看的 伊的胸前抱著一个才幾歲大的查某囡仔 查某囡仔的頭鬃挐氅氅 面皮嘛烏趖趖 老人指著查某囡仔共韋固講 少年人 你看著彼个查某囡仔無 伊就是你未來的家後 啥物 韋固毋敢相信 哪有可能 伊閣遐小漢 厝裡閣散赤 按怎會成做我的家後 慈祥的老人這時煞變甲足嚴肅的 姻緣簿從來袂出差錯 緣分是天註定的 啥人嘛無法度改變 韋固咧想 我才無愛佮一个遮爾小漢的囡仔有緣分 伊愈想愈齷齪 自按呢向腰抾一个石頭粒仔 足受氣對查某囡仔的方向掔過去 擗 這个石頭粒仔 拄好拍佇查某囡仔的印堂 彼个查某囡仔大聲吼出來 伊兩支手仔共老阿婆的頷頸攬牢牢 頭殼額仔頂攏流血矣 韋固這時有淡薄仔後悔 伊戇戇仔徛佇彼 紲落去閣雄雄發覺 老人已經消失甲無看的影矣 尾手 韋固捌講過足濟擺的親情 猶毋過 為著各種因端 落尾攏無講成 致使 伊一直攏無做親情 十四年過去矣 韋固佮一个足媠的姑娘仔成親矣 新娘是刺史大人的查某囝 韋固真佮意伊 猶毋過 新娘的印堂 常在糊一塊小小的花鈿 從到今攏無提落來過 有一工 韋固就擋袂牢好玄問伊 夫人 是按怎你的印堂不時糊著花鈿咧 唉 夫人吐大氣 我三歲彼年 佮奶母佇市仔內 予一粒毋知佗位來的石頭掔著 留一个疧 致使用花鈿遮牢 伊驚一下 敢講夫人竟然是當年彼个查某囡仔 毋過 彼个查某囡仔哪是刺史大人的囡仔咧 干焦聽夫人心肝內足感恩咧講 其實我毋是刺史大人的親生查某囝 我足小漢的時陣 爸母就過身矣 是奶母共我飼大的 一直到幾若年前 刺史大人揣著我 伊對我若親查某囝仝款疼惜 尾仔共我嫁予你 韋固聽煞 頭殼若雷敲著 無錯 夫人就是彼个查某囡仔 伊一下子想起來 月下彼个老人對伊講的話 姻緣簿從來袂出差錯 緣分天註定 啥物人嘛無法度改變的 就按呢韋固就共十四年前的代誌攏共夫人講矣 夫人聽煞了後 溫柔共講 夫君 既然是月下老人 用紅線共咱兩个絚絚的縛連做伙 咱就愛好好仔寶惜這个緣分矣 夫君 你感覺按呢敢好 對彼當陣了後 翁仔某閣較互相寶惜 寶惜神牽起來的這个翁仔某緣分 過著幸福的日子 月下老人的紅線 故事就講煞矣 韋固佮夫人嘛互相寶惜甲睏去矣 月下老人嘛笑咍咍甲睏去矣 月娘嘛睏去矣