（台語版）知府大人用什麼妙招？讓鵝🪿自己在紙上寫供詞！？【🌙 月亮睡著了】 #睡前故事 #鵝 #白鵝 #乾淨校園 #錢知府審鵝 #錢若賡斷鵝

你啊 這个故事聽了 就愛睏矣喔 縣衙內壁頂掛著明鏡高懸 錢知府穿藍色的官衫 坐佇公堂上 講著錢大人啊 𪜶遮官差攏會比指頭姆呵咾講 咱大人真有才調會當造福百姓 因為臨江城內出大賊偷 錢大人真緊就共破案矣 掠著賊頭 予遮賊仔攏毋敢閣偷矣 有一工 隆 隆 隆隆隆 公堂外口傳來一陣足趕的鼓聲 官差趕出去 𤆬一个規頭重汗 衫仔褲滒甲全塗的庄跤人 錢知府就問 公堂下是啥人 你有啥物冤屈 稟告大人小民阿牛 客棧的頭家橫霸霸毋還我的鵝啦 是按呢 阿牛今仔日去城內辦代誌 身邊閣𤆬厝裡的大隻鵝 這隻大隻鵝咧 生做肥朒朒 伊是阿牛𪜶兜的寶貝 阿牛𤆬鵝上街真礙虐 行無幾步路就愛越頭等這隻鵝 阿牛攑頭看頭前有一間客棧 就入去拜託頭家 共鬥相共顧這隻白鵝 等阿牛代誌辦好趕轉來客棧 欲提這隻鵝的時 頭家煞講 啥物鵝 阮客棧後壁的鵝攏是我家己飼的喔 頭家竟然毋承認 阿牛急甲一直幌頭講 毋著 毋著 我有𤆬一隻鵝拜託你顧 毋過頭家死毋承認 受氣閣著急的阿牛 規面紅絳絳 不得已走去衙門摃鼓喝冤 知府聽煞就命官差 叫客棧頭家 人佮鵝攏愛來公堂 無偌久 頭家來矣 頭家客棧後壁的彼四隻鵝 嘛搖搖擺擺行入來公堂 逐隻鵝看起來攏嘛白閣肥 頭家假影無代誌的款 講這四隻鵝攏是伊家己飼的 欲按怎咧 遮官差攏咧嗤舞嗤呲 講鵝攏生做完全仝款啊 哪有法度看出是啥人飼的咧 錢知府喙鬚摸摸咧 想一睏仔講 既然恁攏講袂清楚 按呢就予鵝家己來講啦 伊共桌頭木拍落 來人啊 共這四隻鵝分開關 逐隻鵝攏佮一張白紙 一支毛筆 一个墨盤 叫𪜶寫口供 啥物 叫鵝寫口供 𪜶攏無手啊 欲按怎寫咧 你想敢有可能咧 毋過官差 佮看鬧熱的鄉親 煞無人敢笑這場怪奇的命令 因為這是 人人敬重的知府大人親喙講的啦 經過一睏仔了後 錢知府問官差 鵝有招認無 官差講 稟告大人 逐張紙的面頂獨獨有鵝屎爾 攏無寫半字 錢知府親身落去共鵝巡巡咧 煞落伊就喙鬚捻捻咧 笑咍咍講 喔 好 好 這四隻鵝攏已經招認矣 啥物 公堂上所有的人攏愣去 攏招矣 佗位咧招 干焦有鵝屎爾 啥物嘛攏無矣 干焦看知府大人比第四隻鵝 就是這隻 這隻就是阿牛的 客棧頭家心內誠毋甘願講 大人 憑啥物講這隻就是伊的咧 知府大人嘛無受氣 伊叫逐家去看彼四張白紙面頂 有啥物無仝咧 逐家才發覺著 雖然四張白紙頂面攏是鵝屎 毋過第四張白紙的鵝屎色 無仝款喔 知府大人講 恁閣斟酌看 這隻鵝放的鵝屎是青草仔色的 猶閣有參寡仔幼石仔 這表示伊食的是路邊凊彩發的草 鵝咧叨塗跤的草 伊會連幼石仔嘛煞做伙食落去 庄跤人家飼的攏是按呢啦 錢知府講煞閣越過共頭家講 恁兜的鵝飼佇厝後食的是粟仔 放出來的色水自然是黃的 在場的人聽煞 攏講原來是按呢喔 這个頭家敢若雞胿仔消風 面仔白蔥蔥 嘛無話通講矣 伊隨跪落去招認講 大人饒命喔 是我傷痟貪矣啦 這隻鵝毋是我的 頭家受著伊應得的罪過 阿牛嘛共伊的大隻鵝𤆬轉去 代誌總算清楚矣 府城內底攏咧傳這件奇案 逐家攏那講 那笑 知府大人 真正是會曉看鵝屎的大青天呢 阿牛𤆬伊的寶貝仔鵝轉去厝裡 安心矣睏去矣 阿牛𪜶兜的鵝嘛無咧吼矣 頭犁犁睏去矣 月娘睏去矣